Thursday, March 5, 2009

Cagayan de Oro City Police Office SWAT Team: Kampeyon sa SWAT Rifle Shooting Competition



SAGAD sa mga special police operations, ang elite team sa kapolisan nga gitawag og Special Weapon and Tactics kun SWAT maoy sangonan sa paghimo niini. Kini tungod kay ang matag sakop sa SWAT team miagi man sa pinasahing mga pagbansay-bansay sama sa firing sa lainlaing posisyon (prone, kneeling, standing, awkward positions ug shooting on the move), firing at multiple targets, judgmental firing, panic firing, blindfolded firing, arrest techniques, mobile/vehicle assault, barricade operations ug rappelling. Sa laing pagkasulti, ang mga polis nga nahisakop sa SWAT team nagbaton og kahanas sa paggamit sa armas ug kabatid bahin sa police tactics.

Ug sa tinguha nga mapalapdan ug mapalig-on ang kahanas sa mga sakop sa SWAT team sa lainlaing police offices nga nahisakop sa Amihanang Mindanao, ang Philippine National Police-Police Regional Office 10 mipahigayon kaniadtong Nobiyembre 29, 2008 sa 1st PRO-10 PNP SWAT Rifle Shooting Competition didto sa NMPSA Firing Range sa Barangay Camaman-an, Dakbayan sa Cagayan de Oro.

May upat ka hugna ang maong kompetisyon nga gisalmotan sa mga SWAT team gikan sa Dakbayan sa Cagayan de Oro, lalawigan sa Misamis Oriental, Bukidnon, Camiguin, Misamis Occidental, Lanao del Norte ug uban pang police offices nga nahisakop sa hurisdiksiyon sa PNP-10 Regional Office. Ang upat ka hugna mao ang identification target, team relay, emergency assault ug rescue operations.

Ug human sa tinud-anay ug seryosong pagpakita sa ilang kahanas sa paggamit sa hinagibang mobuto ug sa pagpinsar sa mga taktika pagsulbad sa giatubang nilang mga hagit, ang SWAT team sa Cagayan de Oro City Police Office maoy migawas nga champion sa maong kompetisyon.

Atol sa flag raising ceremony didto sa City Hall Quadrangle sa Dakbayan sa Cagayan de Oro kaniadtong Disyembre 2, 2008, pormal nga gipresentar ni Acting City Police Director Isagani Genabe ngadto sa mayor ug liboan ka mga kawani sa City Hall ang 11 ka mga police officer nga maoy naglangkob sa Cagayan de Oro City Police Office SWAT team.

"This victory signifies our quest to strive hard not only to be the best, but the best among the best in the region," matod ni P/SSupt. Genabe atol sa maong okasyon.

Sa iyang mensahe, si Mayor Constantino "Tinnex" Jaraula mainitong mipadayag sa iyang pahalipay ngadto sa mga sakop sa SWAT team sa COCPO tungod sa ilang nakab-ot nga kadaogan.

Si Mayor Jaraula nagalaom nga ang maong kadaogan makahatag og dugang kadasig sa matag sakop sa kuwerpo sa kapolisan sa pagbuhat sa ilang tahas nga mao ang pagpatunhay sa kalinaw ug kahusay sa katilingban.

Ang COCPO SWAT team nga nagpakitag outstanding performance atol sa labing unang SWAT Rifle Shooting Competition gipangulohan ni P/CInsp. Aaron M. Mandia isip group supervisor, ug PO3 Amiel Petallo, PO3 Angelito Baquilid, PO3 Gernani Gelogo, PO3 Ronald Patriana, PO3 Edgar Lagas, PO3 Jean Paul Villaveto, PO3 Ronie Abamonga, PO2 Marlon Mabalos, PO1 Andy Balabat ug PO1 Mardy Hortillosa, mga sakop.

(Napatik sa Bisaya, Marso 11, 2009, Pahina 12-13)