Bisan naglagom apan hait
daw lansang ang bangkil sa anaconda
nga naglubog sa iyang dughan
Nagnganga andam motukob
sa mga tudlong mangahas pagkuhit
sa iyang panit. Matag buntag magtindog
siya sa tunga sa dalan. Way sapot.
Gituyo aron makit-an ang anaconda
nga kalisangan. Magkurog ang mga tawong
molabay kaniya. Labi na ang mga drayber
sa de pasaherong jeep nga obligadong
mopahagtok og sensilyo ngadto sa lata
nga iyang gihuptan. Sama siya kaabtik
sa kilat. Kusgan sama ni Samson. Ug
way gikahadlokan. Apan karong buntaga,
human mitipon ngadto sa mga panid
sa kasaysayan ang kapitoan ka berano,
daw sa itlog siya napus-an. Nahilis
ang bus-ok niyang mga braso. Natunaw
nahimong yatyat nga panit. Ug
ang anaconda wala maulaw pagpakita
sa iyang gidangatan: Nga siya karon
usa na ka wati nga nasaag sa iyang kalibotan.
(Published in Bisaya Magazine, May 13, 2009 issue. Page 48)
Subscribe to:
Post Comments (Atom)
No comments:
Post a Comment